Baibal ah Cheuhra cheukhat peknak

By: Rev. Sang Uk Cung

Baibal relnak: Malakhi 3:8-12

Biahmaithi: Cheuhra cheukhat peknak kongah cawnpiaknak a phunphun a um caah hi capar hi tha tein rak rel ve law na fiang hrimhrim lai ti zumhnak ka ngei.

Baibal ah chaw peknak kong: Baibal ca nih chaw peknak kong a kan cawnpiakmi cu:

  1. Cheukhat cheukhat: (Leviticus 27:30, Deuteronomy 14:22, 28-29, Number 18:21).
  2. Later le thlaithar: (Exodus 22:30, Leviticus27:26-27, Number 18:12, 2Korin 31:5, Exodus 23:19, 34:26, Deuteronomy 26:1-11, Number 18:12).
  3. Mah lungtho tein pekmi thawlawm: Mah lungtho tein pekmi thawhlawm hi a tlangpi in then thum in then khawh a si. 1. Biakamnak thawlawm( Leviticus 7:13-15). 2. Lawmhnak thawhlawm( Leviticus 7:13,15). 3. Mah lungtho tein pekmi thawlawm( Deuteronomy 16:10).

Cheuhra cheukhat peknak: Cheuhara cheukhat hi zeiruang dah kan pek? timi hi biapi in van zoh hna usih.

  1. Abraham chan(BC1900-1700): “Cungnung bik Pathian tlaibawi Melkhizedek nih Abraham cu thluachuahnak a pek caah Abraham nih Melkhizedek cu Cheuhra cheukhat in thawhlawm a pek” ti kan hmuh.(Genesis 14:20,Hebrew 7:4). Ahmasa bik cheuhra cheukhatnak a si. Cun Jacob nih Pathian sinah kan pa inn i him tein na ka kir ter than ah cun ka ngeihmi vialte cheuhra cheukhat kan pek lai tiah bia aa kamnak kan hmuh.( Genesis 28:22).
  2. Moses Chan(BC 1250-1210): Moses sinah Pathian nih nawlbia a pek tikah hin cheuhra cheukhat pek hrimhrim ding hi nawlbia cauk ah a telhchihmi a si. A biapi in van lak ka duhmi cu, Leviticus 27:30, 31 ahcun, Ram chung i cheuhra cheukhat vialte, lo chung i a vuimi si hna seh, thingthei tlai hmasabik si hna seh, Bawipa ta an si…”tiah kan hmuh. Deuteronomy 14:22,28-29 ahcun, “Na thlaici nih a voimi vialte cheuhra cheukhat, a kum fa tein a voimi cu na pek lai… “tiah aum. Cun Number 18:21 zongah, “Israelmi hna cheuhra cheukhat vialte cu ro caah leivimi ka pek hna…” tiah a um. Cucaah cheuhra cheukhat peknak hi zumtu vialte nih pekding hrimhrim kha a kan chim.
  3. Prophet Chan (BC 520-450): Prophet chan ah cheuhra cheukhat peknak forhfialnak kan zoh tikah Pathian nih ka “hneksat” uh ti bak in a ti cang. Malakhi 3:10 ahcun, “Cheuhra cheukhat a dihlak in thawlawm in ah rak pu u, cun ka inn chungah cun rawl um seh, Ka hneksak tuah ngat u…” ti bak in a kan ti.
  4. Jesuh Chan: Jesuh khrih chan zong cheuhra cheukhat peknak kong a kan chim.(Matthai 23:23b). Jesuh nih a chim duhbik cu cheuhra cheukhat pek lawng kha i rinh loin midang caah dinfelnak, zaagnfahnak le zumhtlak sinak kan ngeih ding a herh zia zong kha a van chap chimh.

Malachi 3:8-12 nih a chimduhnak: “Malakhi” ti a sullam cu, “Lamkaltu or thlahmi” tinak a si. A tialtu hi fiangte in hngalh a si lo nain BC 570-450 hrawng ah tial dawh a si. Malakhi 3:8-12 nih biapibik in a chimmi cu tlangbawi le mizapi hna nih khan Pathian pek awk a simi raithawinak kha Pathian an pek lo, an fir i a duhning in an nung lo. Cucaah bawipa nih ka hnesak tuah ngat u, van innka cu kan hun piak hna le hun piak hna lo,…” tiah an tinak a si.

  1. Pathian nih hneksak a duh maw?: Baibal ca tha tein kan rel tikah Moses phungbia chungah Pathian nih hneksat a duhlonak kan hmuhnak cu Deuteronomy 6:16b ahcun,“ Bawipa nan Pathian cu hnesak nan del lai lo” tiah kan hmuh. Cu lawngsilo kan Bawipa Jesuh Khrih hrimhrim zong nih Matthai 4:7 ahcun, “Bawipa na Pathian cu hnesak hlah” a ti ve. Hi lawng silo in Luke 4:12 zong ah kan hmuh chih. A cunglei baibal caang hna nih cun Pathian hi hneksak a duh bak lo timi kha fiang taktak in a kan chim.
  2. Zeiahdah ka hneksak u a ti?: Hneksak a duhlomi Pathian nih ka hneksak u a timi cu, “Cheuhra cheukhat” ah a si. Aruang cu Cheuhra cheukhat cu Pathian nih ka ta a ti cangmi a si.(Leviticus 27:30-31) nain tlangbawi hna le mizapi nih an rak pek lo caah Prophet ka in hneksak a delmi hna a si. Kannih zong nih kan cheuhra cheukhat in Pathian hi hneksak bak usih. Chimduhmi cu “cheuhra cheukhat hi thate le tling tein Pathian sinah pe usih” ti a kan duhnak a si. Cheuhra cheukhat a pelomi cu Pathian dehmi kan si.(Malakhi 3:9a). ‘Deh’ vialte lakah tih a nung bikmi cu Pathian deh hi a si. Pathian a dehmi hna cu an cungah chiarserhnak a um.( Malakhi 3:9b). Zumtu kan sinak ah hin fakpi in kan nun i chek a herhmi cu Pathian chaw ka pek tikah hin ka cungah Pathian hi a lung aa lawm hnga maw? Pathian hi a dekmi dah kan si? timi hi a si.

Chawpek diklo chiatsehnak: Lamkaltu 5:1-5 ahcun Ananias le Safira nupa hna kong kha fian tein kan hmuh. Pathian sinah an chaw an pek ko nain an nupa in saar thih in an ti. A ruang cu an chaw pemi a diklo ruangah a si. Chaw Pek ko tung i, thih thiamthiam cu a fak tuk. U le nau hna kan nun i chek a herhmi cu thluachuah tlamtling kan hmuhlonak hi kan chaw pek a hman lo caah a si susal hnga maw? Thluachuah tlamtling hmuh na duh ahcun na cheuhra cheukhat kha felte pek a herh. U le nau hna, 2014 chungah hlawhtlingnak hmuh na duh maw? Na duh taktak ahcun na ‘cheuhra cheukhat’ kha tha tein pek hmanh, Pathian kha hneksak hmanh! khuaruah har thluachuahnak na co lai.

Mi zei nih dah cheuhra cheukhat kan pek lai?: Micheu Pathian riantuantu nih cun Pathian riantuanmi kan si caah kanmah pei Pathian chaw a eimi kan si cu, “cheuhra cheukhat” pek a herh lo a ti. A pe duhlomi an um. Nan khrihfabu cazin kha tha tein rak zoh cio hmanh uh. Cheuhra cheukhat tha tein a pe lomi Pastor, Evangelist le zumhtu cu zeitikhmanh ah tlamtlingnak taktak a ngei bal lai lo. Cheuhra cheukhat cu zumtu a simi paohpaoh nih Pathian sinah tling tein kan pek hrimhrim awk a si. Thawhlawm tu cu nanmah le nan sian tawk cio in pek khawh a si.

Zeitindah kan pek lai lo?: Cheuhra cheukhat peknak kong ah hngalh a herh taktak mi cu a tanglei hi an si:

  1. Sianzat a cohlang lo.(Malachi 1:10, Deut. 12:8).
  2. A tlinglomi a cohlanglo.( Haggai 2:12,Malakhi 1:14).
  3. Pek colh loin van I cawi ta a duh lo.( Lev.5:15).
  4. Pek zau loin saupi chiah a duh lo.( Deut.23:21, Amos 4:4)
  5. A thlen a siang lo( Lev. 27:10).
  6. I thlen le 20% chap ding ( Lev.27:31).
  7. Mah duhnak hmunah pek lo ding (Deut.12:13).

Khawikadah kan pek lai?: Cheuhra cheukhat hi Pathian ta a si caah kanmah nih kan duhnak hmun paoh ah peklo ding kha Deuteronomy 12:13 ah tha tein a kan cawnpiak. Cheuhra cheukhat peknak ding cu Malakhi 3:10 ah fiang tein a kan chimmi cu, “Thawhlawm inn ah rak pu uh… kan inn chungah cun rawl um seh…” tiah fiang tein kan hmuh. Cucaah kan cheuhra cheukhat cu Pathian inn a simi kanmah le kan Khrihfabu, kan umnak cioah thate le tling tein kan pek hrimhrim awk a si. Kan ram cawnpiaknak pakhat a ummi cu “A piangthar lomi pastor sinah chawpek cu satan chawpek a si” tiah cawnpiaknak deu a um caah mitampi nih Kan umnak Khrihfabu ah cheuhra cheukhat pe loin kan duhmi Pastor le Evangelist pawl sinah zumhnak thlaici tuhnak ah kan hman tawn. I ral ring!. Kan cheuhra cheukhat cu Pathian nih “ka ta” a si a ti caah nangmah ta a si lo i, nanmah nih nan duhnak poah pek lo ding a si. Midang pek na duh hna a si le nangmah ta a simi cheukua chung tu in nan duhnak poahah peknak nawl na ngei.

Biadanghnak: Kum 2011 ah khan Serampore College ka kainak ah ka har ngai. Cu lio ah USA ka hawi le nupa nih phone a van ka chawnhmi cu sianginn kainak ah na harsatuk ti kan theih i, kan nupa in kan cheuhra cheukhat (thlakhat ah USA $ 300) hrawng hi sianginn na kai chung cu in bawm usihlaw…zei tin?” tiah an van ka chimh. Harsat tuk lio a si caah “ a si ko ee… kai lawm tuk” ti hi a fawi tuk. Asinain cheuhra cheukhat peknak kong hi tha tein baibal ka zoh ve tikah kha ti menmen pek ding a si lo zia kha ka fian ve tikah a cunglei i ka tialmi vialte hi phone in ka chimh hna. Cun phone in thla ka rak campiak hna. Caan a liam lengmang i, cu hna nupa nih Phone an van ka chawnh thanmi cu Cheuhra cheukhat tha tein kan peknak thawngin thluachuah an conak lawngte kha a si. A tu ahhin cu hna nupa cu an Khrihfabu ah bochanmi, Sahlawh rualchan nih bochanmi lawng siloin keimah hrimhrim zong kha ka sianginn kainak ah a ka dirkamhtu ah Pathian nih thluachuahnak a pek hna. Cu tikah lunglawmhnak taktak kha an hmuh. U le nau hna, na chawpek dik lo ruangah Ananias le Safira nupa bang, ton lo le ton lo na tong sual maw? Thluachuah tlamtling hmuh na duh ahcun na cheuhra cheukhat kha felte in na Khrihfabu ah pek a herh. Na pek khawh ahcun cheuhra cheuhnih zong pek khawh a si ko ee. Asinain cheuhra cheukhat hi cu Pathian nih pek hrimhrim ding a si caah tling tein pek khawh rak iz uam hrimhrim. Hlawhtlingnak hmuh na duh maw? Na duh taktak ahcun na ‘cheuhra cheukhat’ kha tha tein na Khrihfabu ah pek hmanh, khuaruah har thluachuahnak na co ko lai.

A reltu vialte Bawipa nih thluachuahnak in pek ko hna seh.

Sang Uk Cung
Church Pastor, Carson Baptist Church
Sanmyo No.5,Kalaymyo.

Note: Rev. Sang Uk Cung facebook page ah laak chinmi a si.

Use Facebook to Comment on this Post

arrow
0
Connecting
Please wait...
Send a message

Sorry, we aren't online at the moment. Leave a message.

Your name
* Email
* Describe your issue
Login now

Need more help? Save time by starting your support request online.

Your name
* Email
* Describe your issue
We're online!
Feedback

Help us help you better! Feel free to leave us any additional feedback.

How do you rate our support?