Mi soi hi “Khrihfa Tha” nunzia a si maw?

Baibal nih zeitindah a kan cawnpiak:

1. Matthai 7:1 ahcun, Jesuh bak nih “Pathian nih an soi nakhnga lo Mi va soi hna hlah” a ti.

2. Luke 6:37 ahcun, “Midang kha va soi hna hlah u law nan nih zong Pathian nih an soi ve hna lai lo” tiah kan hmuh rih.

3. Jeim 4:11, “ Ka u le ka nau hna, Pakhat le pakhat i sio hlah u. a hohmanh a u a nau kha a sio i sual a phaw lengmangmi cu Nawlbia kha a sio i sual a phawmi a si. Nawlbia cu sual na phawt a si ahcun nang cu nawlbia a zulmi khan a si ti lo, nawlbia sual a phawtu khan a si leh lam.” a ti.

4. Luke 18:9-14 ah fiangtein kan zohthan lai: “Anmah kha kan ṭha tiah aa ruat i midang vialte kha zei a rel lomi hna sinah Jesuh nih hi tahchunhnak bia hi a chim: “Mi pahnih cu Biakinn i thlacam awkah an hung kal; pakhat pa cu Farasi mi a si i a dang cu ngunkhuai khawltu a si. Farasi pa cu a dir i hi bantukin thla a cam: ‘Maw Pathian, kei cu midang bantukin hak a kaumi, lih a chimmi, nu le pa sualnak a tuahmi, ka si lo caah nangmah cu kan lawmh; cun khi ngunkhuai khawltupa bantuk zong khi ka si lo caah kan lawmh fawn. Zarh khat chungah voi hnih lengmang rawl ka ul i chawva ka hmuhmi vialte cheu hra cheu khat kan pek,’ tiah a ti. Sihmanhsehlaw ngunkhuai khawltupa cu lamhlatpi ah khin a dir i vanlei hmanh zoh ngam loin a ṭang aa cum i, ‘Maw Pathian, kei misual cungah hin zaangfahnak ngei ko,’ tiah a ti. Hihi kan chimh hna: Farasi mipa kha si loin hi pa tu hi a sualnak ngaihthiam in inn ah a ṭinmi cu a si. Zeicahtiah amah le amah aa ngantermi cu ṭhumh an si lai i mi tangah aa dormi cu mi ngan ah ser an si lai,” tiah a ti. Hihi Jesuh nih misoi hmangmi hna nih zohchun dingah a kan cawnpiakmi a si.

5. Luke 6:31, “kan tuahpiak hna seh tin a duh ahcun mi va tuah piak hna”. Tiah a kan cawnpiak.
Minung a “ho kan sinak” a langhtertu cu kan “chimmi bia” hi a si. Cu a hrampi cu “Khuaruahnak” hi a si. Rechard Sibbes, (1577–1635) nih cun,” kan khuaruahmi hi, nifa kan biachim ning hram a si ko.” a ti. Cu he ai lomi baibal ca cu Luke 6:45b, “… miṭhalo nih a lung chung i thil ṭhalo a khonmi chung khan chiatnak a chuahter. Zeicahtiah mi nih a kaa in a chimmi hi a lung chung i a khatmi kha a si,” tiah a ti. Kan vawlei hi i khatlonak in a khat. Cu chungah kan khua ruahning, biakning, zumhning, kha kan upat cio. Cu bantuk in, minung ciocio kan si nain Pathian kan zumhning, pomning a dangmi hi kan i upat piak cio a herh. Cu nih cun ai khat lomi pakhat le pakhat kar ah i hmuh thiamnak, i cohlan thiamnak le i upatnak a ser.
Asinain a cheukhat cu Luke 18:9-14 chung i Farasi pa bantuk in mah zumhning, cawnpiak ning lawng a hman bik, a tha bik, ah aa ruat i midang cawnpiak ning le pomning cu an soi cu Jesuh nih a fih. A hlei in Sunday ah pulpit cungin “Mi soinak kong lawngte chim” cu “Carson Sunday, Mother Day or Fathar Day” kan tuahnak in a sual deuh. Jesuh nih Luke 18:9-14 chung i a kan cawnpiakmi Farasi pa bantuk an si.

Jesuh nih a fih. 
Cun kan theih a herhmi cu, “Jesuh cu midang sualphawt a hmangmi hna BU sinah a dirpi bal hna lo”(John 8:1-8). Asinain kannih cu tuaktan loin “AMEN” kan pek. Miinung uarnak, chungkhar sinak, tlangkhat sinak, Bu khat sinak le hawikom sinak ah kan dir. Jesuh cawnpiaknak ah kan dir lo.

Paul nih a kan cawnpiakmi, “Zeizong ka hngal ve ko, tiin aa ruatmipa nih hin a hngalh awk tlukin a hngal tawn lo”(I korin 8:2) a ti awh. Cucaah Filipi 2:3 chungah a kan cawnpiakmi cu, “Pakhat le pakhat i entainak le mah pumpak thangṭhat kawlnak kha nan lakah umter hlah u. Toidornak lungthin tu kha ngei cio u law midang nakin ka ṭha deuh tiah zeitikhmanh ah vaa ruat hlah u.” tiah a ti. Misoi hmangmi hi ka thei, ka ngal, midang nakin ka tha bik, ka dik bik ti lungput ngeimi an si. “Khrihfa tha” nunzia si lo. “A tlinglomi vawlei ah a tlinglomi minung nih tlinglo piin kan i hruai ti hi theih peng kan herh”.
Thiang thlarau nih fiannak in pe ko seh. Amen.

Sang Uk Cung
Baptist Pastor
Carson Baptist Church, Kalaymyo.
Ph:09442001011

Use Facebook to Comment on this Post

Join the Discussion

arrow
0
Connecting
Please wait...
Send a message

Sorry, we aren't online at the moment. Leave a message.

Your name
* Email
* Describe your issue
Login now

Need more help? Save time by starting your support request online.

Your name
* Email
* Describe your issue
We're online!
Feedback

Help us help you better! Feel free to leave us any additional feedback.

How do you rate our support?