“Cultural Sunday” hi zeiruangah dah kan hman?

“Cultural Sunday” timi cu “Nunphung Sunday” ti a si. Baibal fimthiam sang tampi nih an zumhmi pakhat cu, “Miphun pakhat a sinak” ah then awk a tha lomi cu, “a Biaknak, a Nunphung, a Hoh le ca” hi a si. Mi pakhat nih an holh le ca a thlau ahcun an “Biaknak zong a tlau” ti a si.

Abianain “Goths” miphun hna hi Europe ram ah AD 400 hrawngah Rome rampi a hung dohtu le teitu an si. Goths sin i siangbawi a tuantu Ulfilas nih Goths holh cun Baibal a leh piak hna i Baibal tling tein an holh in an ngai. Asinain cu “Goths holh” cu duhsah tein in a thi i, a tu ahcun Goths holh a hmangtu an um ti lo. An biabal cu Library ah a um rih ko. A reltu an um ti lo ahcun holh ti ah a cang. An miphun zong a thi ve.(Rev. Dr. Hre Kio, Dingdi Mekazin(volume 1,No.1,2015).page 20).

Rom pennak cu a kauh tuk caah biaknak kip, nunphung kip, holh le ca kip hman awk a tha lo. Cucaah siangpahrang Alexander nih pennak a lak hnu in Greek biaknak, nunphung, holh le ca nan hman ding an rak ti. Izipt siangpahrang Ptolemy Philadephus (BC 285 –BC 246) le bang nih cun Hebrumi nih an baibal hi anmah holh in an rel peng ahcun Greek holh an thiam sual lai lo tiah Greek holh in a rak lehter hna. Minung 70 nih ni 70 chungah an leh dih. Cu baibal min cu Septuagint or LXX ( Sawmsarih) an ti. Asinain Judahmi nih an biaknak, an nunphun, an ca, an holh a tlau lonak dingah biatak tein fim an cawnnak hmun cu an biakinn a simi, “Synagogue” ah a si. Cucaah miphun dang kip “sal” taang an si nain an biaknak, an nunphun, an ca, an holh, an thlau kho lo.

A liam cia kum (15) hnu in vawlei cung Khrihfabu cheukhat ah “Cultural Sunday” hi hman thawk cio a si. Hi “Cultural Sunday” nih aa tinhmi cu “Pathian pekmi an Miphun thuam, an miphun ringawn(Music) phunkip, an miphun holh le hla, lam he Pathian sunparnak pek Ni” kha a si. Hlan lio ahcun “Setan biaknak thilri” an si nain atu ahcun “Pathian thangthatnak thilri” ah an cangter. India sianginn ka lai lio ah Bangali sinah ka rak hmang bal. an thuam, an riangawn, an lam le an hla he an Pathian an thangthat. Kai lunghmuih tuk.
“Nunphung Sunday” hi Baptist nih kan tuahnak a ruang cu kan biaknak, kan nunphung, kan holh le ca then awk a tha lo. Pathian kan thangthatnak ah kan hman ve hi a herh ve.

A ruang? Chin miphun cu mirang sal in Kawlsal ah an tla. Kan biaknak, kan nunphung, kan holh le ca vialte hrawh an i zuam. Sianginn ah ca kan cawng kho lo. Cucaah kan biakinn hi kan biaknak, kan nunphung, kan holh le ca kan cawnnak hmun ah kan hman. Kalaymyo i Carson Baptist Church cu kawl nih an kan kulh. Asinain Biakinn ah kan biaknak kong lawng si lo, kan nunphung, kan holh le ca kha tha tein kan cawnpiak hna pinah “Nunphung Sunday” kan tuah i hi ni ah Pathian pekmi kan tuam, kan nunphung, kan holh le ca a biapi nak kong kha kan cimh hna. Cucaah Chin ram tlukin tein kan fale nih kan holh le ca an thiam.

Tha tein ruat hmanh! Pathian nih Chinmi a kan dawt i vawlei cung khua zakip ah kan um cang. Isreal miphun bantuk in kan biaknak, kan nunphung, kan holh le ca kha kan biakinn nih fakpi in nan dirpi lo ahcun “Goths” bantuk in na fale chan ah nan tlau colh lai.Kan dirpi a herh. Kumkhat ah viokhat cu Pathian pekmi kan thuam, kan ring awn, kan lam, kan hla in amah thangthatnak kan hman ding a si.“Cultural Sunday” tuah cu “kan kokek sining in Pathian thangthatnak pek a si” ko. “Sui cawfa i ser” biak a si lo. Kan fian lo caah a si. Vawlei cung ah hin Pathian nunphun, Pathian ringawn, Pathian holh le ca a um lo. “Kanmah le kan nunphung, kan ringaw, kan holh le ca hi Pathian ta an si dih i amah sunparnak peknak” ah hman dih ding a si. “Nunphung Sunday” cu Pathian pekmi kan sining dihlak in Pathian kan thangthat “Ni sunglawi” tu a si.

Thiang thlarau nih fiannak in pe ko seh. Amen.

Sang Uk Cung
Church Pastor
Carson Baptist Church, Kalaymyo.
Ph:09442001011

Use Facebook to Comment on this Post

arrow
0
Connecting
Please wait...
Send a message

Sorry, we aren't online at the moment. Leave a message.

Your name
* Email
* Describe your issue
Login now

Need more help? Save time by starting your support request online.

Your name
* Email
* Describe your issue
We're online!
Feedback

Help us help you better! Feel free to leave us any additional feedback.

How do you rate our support?