IBC Biakinn caah Thlacam sawmnak

evangelistic-service

Upat mi IBC chungtel dihlak,

IBC Building Comitte member nih Bawipa dawtnak, azangfahnak  le avelngeihnak thawngtha lawmhnak mithmai he nan kut ka ning tleih hna. Bawipa min cu thangthat si ko seh! Amen.

Nizan zarhpi ni pumh ah kan pastor pa nih thongthanhnak angeih cang btk. in 27.05.2017 kl. 12:00 ah Building cm. hrilhhawhnak in kan Biakinn caah Pathian sin thlacamnak progrem ngeih asi lai caah ahopoh nan rak itel cio ding in Bawikhrih min in kan sawm ko hna. Rianttuantu upa lawnglawng an tuahawk, an  kalawk le an camawk asi timi rinhnak ngei hin lo tein keimah ka tel ve lo ah cun achanbau ko lai Bawipa nih keimah tel tengteng aka herh timi siaherhnak nganpi ngei hram ko uh tiah kan nawl ko hna. Ahlei in khrihfa upa  dihlak, nubu hruaitu dihlak le mino hruaitu dihlak le committee hruaitu dihlak kan itel kho ding zong nolh than ka duh ko.

Kan progrem cu keimah nih kan hruai ko hna lai.  Sermon tawite chim duh chim khawh, tehteh khan awk angei mi zong nih tehteh khannak, Bawipa biathli chimphuan aduh mi nih chimnak le lungduh siaherh chim le forfialnak chim duh mi zong chim khawh asi lai. Mah bel te asi khawh chung in caan tawi tete. In hman khawh kan rak izuam cio hna lai.Thinlung in hla  sak duh mi tete hna zong nan ngeimi aum ah cun caan karlak ah hla sak ding tete zong tenh pah asi té lai. Ahohmanh caan thiahmi aum lo. Kan nu le zong hi progrem adih in hlacawn asi lai ti asi le lawmhnak he nan kan telpi dih  lai timi ruahchannak kan ngei hna caah lawmhnak tampi kan ngei.

Kan Biakinn atu lio adirhmun le asi ning cu rianttuantu upa sin in theihpah lengmang mi le hmuh mi khi asi ko. Mi tampi nih cun dih zawkzawk seh lim zawkzawk in duhning in nihin ah hmankhawh kan duh cio dih mi asi. Sihmanh sehlaw kan duh ning arak si ruam lo. Achung ah theihkhawh mi he theihkhawh lo mi he thil ngan he thilfa he rak  buaipi ding mi tampi arak um len. Cu chung ah cun kan kal lio pi asi. Ahohmanh i muatchiat ding pakhat hmanh kan um lo, aruang cu kan ram asi lo kan miphun hawi umnak asi lo an holh an ca le an Mah bang in kan thiam fom lo cu. Nang le kei nih kan tuahkhawhmi le kan ttankhawh mi aum ti lo. Cucaah Bawipa sin lawnglawng ah lawmhnak bia chim le kan duhmi chim le hal hi kan rian ngan bik asi ko. Hmailei kong vialte Bawipa nih atheih dih ko.

Nihin  kan dirhmun in cun lungawthawm in kan um lio caan asi. Kan zang ader lio caan asi, biachuk biavai atam lio asi, kan thinlung akan thenthek lio caan asi, lungnuam lo in kan um lio caan asi, pakhat pakhat kan duhnak le kan hmuh ning adan/ akhat lo lio asi, riantuantu pakhat le Pakhat imawchiat lio kan itheihthiam lo lio caan asi, cutluk in tukforhnak le temttawmnak atam lio asi. Nang le kei kan tuah khawh mi aum lo. Cucaah Bawipa sin ah biatak thlacam taktak kan herh lio asi. Kan Bawipa Jesuh zong nih akan cah mi cu hi volei nih an teinak hna hnga lo ding Pathain sin ah lunglawm te in thlacam zungzal uh akan ti bang mang le kei cu misual mipalh kan si. Cucaah Pathian sin lawnglawng ah thlacam ko hna uh sih.

Tehtekhannak le forfialnak sermon tawi,

Pathian hi IBC kan caah atha khun tuk hrinhran ko. IBC kan dirh ka  ah cun pumhnak Biakinn  kan duhtuk kan herhtuk ko nain cutluk in kan tumtahngam colh lo. Sandnes hrong thilman le asi ning le kan sining kan izoh tik ah kanmah le kanmah kan i theih pah ko caah kan duhtuk mi akong kan Phai hngam lo. Kum 3-4 arauh hnu ah zeikhom poh asi ah thlacamnak he Building fund kan ti lai i duhsah tein kan hmuh mi phaisa fangkhat hnih zong kan khawn pah ko lai, cun Building fund te zong hi ani le acaan, akum nih lai arel  te ko lai caah kan duhbik mi kan herhbik mi Biakinn zong Bawipa nih tuante zong akan pek khawh mi asi ko ti asi. Cutin tecun Biakinn caah Building fund cu Pathian sin thlacamnak he kan tawk. Kan rak iruah ning cun atlawmbik ah kum 15 cu kan rau ko lai ti asi. Sihmanhsehlaw  atu cu kan ruah lo leng in  Tumcawk Pathain asinak cu arak i phuang cang i atu Biakinn caw kho, acaw cang mi dir hmun akan chiah cang caah Bawipa min thangthat si ko seh. Hi kan dir hmun hi IBC nih Pathain sin lawmh lo awk kan that lonak dir hmun pakhat asi.

IBC cu nan theihcia mi asi ko, Sandnes, Ålgård le Bryne khuasa Laimi hritlai nih dirhmi khrihfabuu asi. Biakinn caah kan saduhthah cu Sandnes khualai  asilo ah kan khuathum vialte caah  alaibiknak hmun te kan rak hal tak. Atu Biakinn khi  kan hal ning tein Bawipa nih akan pek tiah ka ruah, ka cohlan mi asi. Ålgård in minute 15 mongh asi, Bryne in minute 10 mongh asi cun Sandnes sentrum in minute 8/9 mongh asi. Adang zeitin deuh nan hmuh cio hnga? Zapi duh le duh lo GM hrilh asi  tik ah 98% nih lunglawm thanuam tein cohlan asi.  Hi ning tein Pathian sin ah lawmhnak kan chim tti hna lai. 

Bible cang pakhat te vun thil chih ka duh. 

1.Chanrelnak  28:20 chungbia asi.

0“Khi tikah David nih a fapa Solomon cu a thawh i, “Ṭhawng ngai le ralṭha ngaiin um law ṭuan tuah. Ṭih hlah, na lung dong hlah; zeicahtiah Bawipa Pathian, keimah i ka Pathian hrimhrim cu na sinah a um. Bawipa inn chung rianṭuannak ca i rian vialte cu lim a si hlantiang amah nih cun an deuh lai lo i an hlaw fawn lai lo

Bawipa kan sin ah khuaruahhar in aphuang taktak ko. Nihin tiang kan sual kan palh bu in  Bawipa sunparnak alang lengmang ko. Cucaah ralttha tein kan duh mi cu Bawipa sin ah chim ko uh seh, hal rih ko tuah uh sih. Akan deu bak lai lo, hlawt zong akan hlaw taktak lai lo. Bawipa asunparnak kan hmuh chinchinnak  tu asi lai timi zumhnak nganpi ka ngei ko. 

Bawipa nih athar in thlachuahnak kan pek piak ko seh.

Upatnak le lunglawmhnak he

James Biak Lian

IBC Building leder

Use Facebook to Comment on this Post

arrow
0
Connecting
Please wait...
Send a message

Sorry, we aren't online at the moment. Leave a message.

Your name
* Email
* Describe your issue
Login now

Need more help? Save time by starting your support request online.

Your name
* Email
* Describe your issue
We're online!
Feedback

Help us help you better! Feel free to leave us any additional feedback.

How do you rate our support?