Bible le Pumpak Zumhnak

Bible le Pumpak Zumhnak

Khrihfa tampi nih anmah pumpak zumhnak in Baibal kha an kalpi i a sullam kha an leh ton.  Cu ruangah Baibal tialtu nih a tial duh hnawh chanmi biatak kha an thlau i anmah duh in a sullam an chuah lengmang caah Baibal nih Khrihfabu tampi a kan buaiter nak asi.  Baibal tialtu nih an rak tial hnawh chanmi le an tinh sullam taktak kha Khrihfa poah nih i lak i zumh siseh law Baibal nih Khrihfabu a kan buaiter lem hnga lo.  Bawi Jesuh chan lio zongah Judahmi hruaitu hna le Bawi Jesuh hna nih Baibal sullam an lehning an  i khat lonak hmun tampi ah kan hmuh. Tahchunhnak ah Luke 10:10-26 ah, Jesuh nih phungbia cawnpiaktu sin ah, “Cathiang nih zeitindah an chim i an chimmi cu zeitin in dah a sullam naa lak ning asi” tiah ati. Phungbia cawnpiaktu nih “innpa” timi sullam aa lak ning aa palh.  Judahmi miphun innpa long kha innpa ah a ruah. Samaria miphun zong Pathian sermi ansi i dawt ding ansi kha a rak ruat bal lo. Pathian dawtnak hi an miphun le biaknak sinak kuang chungah an khumh i a bi tein a sullam kha an kalipi.  Cucu Jesuh nih Samariah mitha pa kong tahchunhnak hmang in a chim hnu hna long ah an lung a fiang ti kan hmuh.

NCCF Bible Conferece, Egersund

Baibal sullam lehnak timi le pumpak zumhnak cu aa dang.  Mah pumpak zumhnak cu Baibal nih a rak chim duhmi sullam he aa kalhmi an um ton.  Baibal zumh kan ti mi cu Baibal kha mah duhnak zon te long lak, mah duhning hoih in a sullam kalpi kha asi bal lo.  Mah duhning hoih le mah ruahnak in Baibal sullam kalpi cu Baibal zumh asi lo. Mah ruahnak zumh tu asi deuh. Baibal tialtu nih an rak tial lo can ah an rak tial hnawh chanmi sullam kha kan kawl hnu ah Baibal tialtu lungput, tinhmi, zumhning le sullam taktak kha kan theih a herh.  Cu hnu longah ka zumh lai maw zumh lo ticu kanmah nawl asi.  Baibal duhning in na zumh ahcun Baibal zumtu na si. Nangmah pumpak duhning in na zumh ahcun nangmah ruahnak a zummi na si.  Baibal sullam leh timi cu mah pumpak ruahnak sawhsawh in kapi ding kha asi lo. Atialtu zumhnak le lungput lak khawh zuam kha asi deuh.  2Tim 3:16 ah, “Cathiang hi a dihlak in Pathian thaw chuah hnawhmi asi i biatak cawnpiaknak caah le palhnak cawnpiaknak alnak caah le palhmi remhnak caah le dingte in nunnak ding cawnpiaknak caah a thahnem mi asi.”  Timote cakuat cu AD 60 le 65 karlak rak tialmi asi i hi lio can ah Biakam hlun le a thar kha a dihlak hi tial asi rih lo.  Cu caah biakamthar uk 27 hi Cathiang timi chung ah a rak i tel rih lo. Pathian nih thaw a chuah hnawhmi cathiang chung zong ah arak i tel rih lo.  Pentateuch timi Nawlbia cauk 5 (Genesis, Exodus, Leviticus, Deuteronomy le Numbers) long hi Jesuh le zultu hna chan tiangah cathiang an rak ti mi asi.  Baibal kha a biafiang in a kal pimi hna nih “cathiang cu Pathian nih a thaw a chuah hnawh” kan ti tung a thaw a chuah hnawh mi Nawl bia zulhnak thawng in khamhnak kan hmu lai lo kan ti fon. Cucu ruah awk tampi a um.

Pathian Thawchuah Hnawh timi cu Zeidah asi?

Khrihfami nih kan buaipi ngaimi pakhat cu a cungah kan chim bangin “Pathian thawchuah hnawh” timi bia hi asi.  Mirang holh in Inspiration” timi cu Latin holh “inspirare” in a ra mi asi i a sullam cu tinhmi pakhatkhat caah thawh chuah hnawh (to breath in) tinak asi.  A sullam cu Pathian nih amah bia nung kha vawlei ah phuan in a umnak hnga amah zumtu hna kha thlarau lei fimnak, hngalhthiamnak, le thil ti khawhnak thawnnak a pek hna, caah Pathian bia an chim an tialmi kha hmual le thawnnak a ngei tinak asi.

Phundang in chim ahcun Pathian thlarau thawnnak le minung thil ti khawhnak pahnih i kalhnak zeihmanh um lo in luat ten Baibal catialnak ah rian an tuan ti tinak asi. Pathian nih minung kha a thimi thilri (robbot) bantuk in a hman siloin amah lilah nih minung sin ah a pekmi thluak le thinlung le ruah khawhnak le minung bia le nunphung hna kha a hman hna tinak asi. Baibal tial khawhnak dingah Pathian nih lamkaltu hna le Baibal tialtu hna kha bia cinken khawhnak pahrang a pek hna.  Cu hnu long ah Thiang Thlarau thawnnak nih minung kha a hman hna tizong ti khawh asi.   Baibal cauk le cauk dang aa dannak cu a reltu nih an rel tikah biatak hngalhter khawhnak thawnnak a ngei, Pathian bia nih a reltu nunnak ah ceunak fimnak le hngalhnak thuk a pek, a reltu nunnak, ziaza, le lungput kha a thlen khawh, cucu Pathian thawhchuah hnawh ruangah asi.  Pathian nih Baibal cauk catlap cung tialmi biafang pakhat hnu pakhat kha minung bang in a thaw a chuahhnawh dih hna tinak siloin a tialtu le a reltu minung hna an nunnak tu kha ceunak le thawnnak a pek hna tinak asi deuh.  Baibal bia kha Khrihfa nih zeicahdah kan zumh ti asi ahcun Pathian bia cu kan nun ram ah a tling ton i kan nun ah a hman a dik ti kha fiangtein kan hngalh caah asi.

A cunglei chimmi he pehtlaih in Khrihfa thenkhat nih a biafang in thaw chuahhnawh an zumh. A ruangcu Baibal chung biafang hna hi pakhat hmanh aa palh kho lo tiah an zumh.  Cu bantuk in Baibal a zummi hna nih Hruaitu nawlngeihnak, Adam sualnak, Nu ngakthiang chungin Jesuh chuahnak, pumsa in thawhthannak le Jesuh voihnih ratnak te hna hi a tlangpi in an dirpi.  A ruang cu Baibal cauk an hmuhning le an zumhning le a sullam an i lak ning ah dannak a um ruangah asi. Prostestant mainline Khrihfabu  tam deuh, kanmah Baptist telhchih in kan zumhmi cu Baibal hi a biafang khengkheng (literally) siloin a “sullam in” (by meaning) asiloah “chim duhmi”(by significance) in kan dirpi deuh.

Gen. 2:7 ah Nunnak petu thaw kha a hnar chung ah a chuah hnaw i a nung timi le John 20:22 ah Bawi Jesuh nih zultu hna kha a thaw a chuah hnaw hna i thiangthlarau kha hmu ko uh” a ti hna bantuk in Pathian nih minung kha thawnnak le hngalhnak, ruahkhawhnak, tuaktan khawhnak, a pek hna caah Pathian thawnnak le lamhmuhsaknak in Baibal kha an tial tinak asi.

2Peter 1:21 ah Peter nih a chimmi cu “zeicahtiah profet bia cu minung duhnak chung menmen in a chuakmi asi lo, sihmanhsehlaw Pathian sinin a ra mi bia kha mi nih an chim tikah Thiang Thlarau nih a fial hna caah asi”.  Thiangthlarau nih Pathian bia theihternak, karhternak le chimh phuannak kha minung hna hmang in a tuah tinak asi. “Cathiang hi a dihlak in” timi hi kan chim hmasa bang in biafang pakhat cio in le dehmi ful stop le coma tiang kha vancung Pathian nih a cabuai cung ah cauk a kau i a thawh a chuahhnawh tinak asi lo.

Paul nih a rak chim duhmi cu profet nawlbia hna le chimmi bia hna cu minung ruahnak sawhsawh in tialmi an si lo, a nungmi Pathian sinin a ra mi bia asi, khuaruahar Pathian riantuannak le Pathian thilti khawh nak asi a ti.  2 Kor.3:6 ah, “Tialmi Nawlbia nih thihnak a chuahpi i Thlarau nih nunnak a chuahpi” a ti.  A sullam cu nunnak petu Pathian thlarau riantuannak tel lo ahcun Baibal cu a thi mi ca men asi ko hnga. Sihmanhsehlaw Baibal a nunter tu a um i cucu Pathian thlarau asi.  Cu Pathian thlarau nihcun minung holh le bia hmang in aa phuang i cu aa phuannak cu Pathian bia  kanti mi asi.  Baibal cu khel pahnih: Pathian khel le minung khel a ngei.  Baibal cu Pathian sinak le Minung sinak, Pathian phuannak tuanbia le minung phuannak tuanbia fonhmi ansi tinak asi.  Cu bantuk in Baibal kan zumhnak nih Baibal nawl ngeihnak kha a hrawk lo.  Baibal chung i biatak tu kha a kawl i Pathian nih minung siter a duhmi lungput le sining tu kha hmuh aa zuam.  Heb. 4:12-13 ah “Pathian bia cu a nung i a thawng.  Kaphnih har vainamnak in ahar deuh. Hlanglak in a cheu khawh, nunnak le thlarau an i tonnak tiang, hliahcang le thlek an i tonnak tiang a cheu khawh” ati. A sullam cu thawnnak cu thlarau ah khan asi i minung hmanmi cafang le bia ahkhan asi lo tinak asi.

Paul nih Cathiang hi a dihlak in Pathian thawchuah hnawhmi asi ati tikah a chim duhmi sullam cu a chimhmi pa Timothy nunnak i Pathian bia nih rian a tuannak le Paul chan lio ah a chuakmi cawnpiaknak hman lo, Gnostic le Docetic cawnpiaknak te hna a remh kho tu Pathian bia asinak kha chim a duhmi asi.  Timothy cu a nu lei kap in Judahmi asi i a pa lei kap in cun Greek miphun asi (Lamkaltu 16:1).  A nu nih Pathian bia kha rawl khehin a rak kheh i a thangmi pa asi.  Judah miphun nih an chim tonmi cu Judah ngakchia hna cu an an nu le nih an pom khawh hna can thawk in Pathian nawlbia kha an nu le hnuk he an ding ti cang.  Judah ngakchia pakhat nih Pathian nawlbia philhnak chah in a mah le amah a min kha aa philh deuh lai an ti.  Cu bantuk in Pathian bia nih Timothy nunnak kha a thlen i a hmette in a nun zia a remhtu zumhtlak Khrihfa mino pakhat ah a ser kho tu cu Pathian bia thawnnak hmual asi ti kha a chim tikah Paul nih “Pathian thawchuah hnawh” ti bia kha a hman tiah kan hmuh.

Pahnihnak cu Paul chan lio ah Gnostic le a dangdang cawnpiaknak hman lo chungin lam ding ah a hruai kho tu, cawnpiaknak hman lo a langhter kho tu cu Pathian bia asi ti kha “thawhchuah hnawh” timi bia nih a chim duhmi asi fon.  Baibal lilah ah kan hmuhmi cu (1) biatak cawnpiaknak caah asiloah khamhnak ah a kan kalpi kho tu fimnak a kan pe tu asi.  Khirhfa biaknak cu tialmi cauk ah a hram a sihmi siloin a nungmi Jesuh Khrih minung cung ah a hram a dirmi asi caah Baibal long nih nunnak biatak kong hi kan chim khawh; (2) palhnak cawnpiaknak alnak timi cu Baibal bia nih mi sualnak rumro kha a kawl tinak asi lo, nunnak biatak kong cu Pathian bia ah a um caah Pathian bia long nih mah le mah tlinlonak kha a hmuhter khawh tinak asi; (3) palhmi remhnak caah sullam cu cawnpiak hman lo zumhnak hman lo, ziaza hman lo tampi a chuah tikah Jesuh Khrih cawnpiaknak long nih a dikmi lam kha a hmuhsak khawh tinaka si; (4) ding tein nunnak ding timi cu mah pumpak ca long nunnak ah a kalpi tu siloin a dingmi Pathian caah le mi dang caah a kan nunter tu, thil dik thil hman lam ah a kan kalpi tu tinak asi.

Cabia laknak: NCCF Bible Conference ah Rev. Dr. Semuel Ngun Ling cawnpiaknak chungin:

Use Facebook to Comment on this Post

arrow
0
Connecting
Please wait...
Send a message

Sorry, we aren't online at the moment. Leave a message.

Your name
* Email
* Describe your issue
Login now

Need more help? Save time by starting your support request online.

Your name
* Email
* Describe your issue
We're online!
Feedback

Help us help you better! Feel free to leave us any additional feedback.

How do you rate our support?