LBC Nunphung Zarh ah biatawi By Richard Zatu (Oct. 26, 2014)

Mi cheu nih October 26 i LBC Nunphung Zarh ah biatawi ka chimmi taar an ka fial caah ka vun taar.
Nan zate Zingtha! Nunphung Zarh ahcun Laiholh hmang usih.

Kum 2014 Nunphung Zarh akan phanh tertu kan pa Pathian cungah thangthat nak um ko seh. Tuzing Nunphung Zarh ah biatawi chimnak caan ka hmuh caah kai lawm. Tukum hi ka vaan atha. Biatawi chimnak caan sunglawi voihnih ka hmuh.

Ka min cu Za Tu asi nain 50 hmanh ka tu rih lo. Min kong cu ka chim than te lai.

Richard Zatu

Nunphung le Caholh Bu hi LBC ummi komiti vialte lahah mi uar lo bikmi asi. Popular asi loh. Mission caah, mino caah, nubu caah, hngakchia caah, quarters saknak caah, retreat tuahnak caah tibantukin thawhlawm achuak lengmang i nunphung caah zeihmanh achuak ballo. Komiti member pawl zong meeting kai kan huam lo. Kan meeting hi minit 15 ahcun adih tawn. Asinain san atlai tukmi komiti kan si. Muko mekazin hna kan chuah. Laiholh in Holh timi vampangtaar hna kan tuah. Kan komiti ca nan hlut ballo le apoi lo. Innhmun kaupi kan nei i Lai inn kan sak tikah nan hlut lulhmalh te lai.

Ka min aka saktu hi ralkap chuak asi i ral phunphun ka tu ati duhnak asi. Asinain ahawipa ahna atla lo. “Tial Kim nih maw Za Tu avai sak. Sawnnga hmanh atu lai loh. Japan ral cu kan tu ngam lo lepei kan hong zaam cu. Kan tlik le kan zaam pei athang ko cu. Kei cu fapa ka neih ahcun Zam Thang kai sak lai” ati. Fapa cu anei i Zam Thang ai sak taktak.

Laimi hi min kan isak tikah sullam nei tein, chuan khan bu tein min kan isak. Laimi cu lothlo kan si. Sipuazi tuah kan hngal lo. Cucaah lahkhah ei kan uar. Lothlo nih kumkhat ah voikhat kum avui lioah lahkhah ei cu thlakhat voikhat kum avui. Kumkhat ah voi 12 avui. Cucaah Laimi nih lahkhah ei kan uar tuk i lahkhah eimi nih an fale min ah Thla To, Thla Or, Thla Hngak tiah min kan isak. Laimi cu ramvaih le sakah hmangmi kan si i cakei le vom le ngal akapmi nih Hrang Kap, Hrang Thio, Hrang Uk tiah kan iti. Paih hi Laimi lawng neihmi lentecelh asi i paih thawngmi nih Buan Khar, Buan Peng, Buan Khirh tiah min an sak hna. Paihnak ah ai vuami le ai velmi nih Buan Hnok tiah anti. Ralbawi ngan asimi Col Van Kulh nih atupa Ral Bawi Lian Bik tiah min ai sak. Hi belte hi asau tuk i abuai kho. Min saktu nih amah asining chuankhan i minsak nunphung hi asital tuk ka ti.

Nunphung kan timi Mirangholh in ‘culture’ kan timi hi Internet ah zeti tein dah ahrilhfiah hnga ka ti i ka zoh. Hi tin ati. “Mi bu pakhat nih an neihmi holh, biaknak, zatlang nun, eidin, hla le art (anupingia) asi” ati. Ahmasa bik ah ‘holh’ ati. Nunphung hi holh asi. Holh hi nunphung asi. Cun acunglei hrilhfiah ning ahcun caholh achangtu ah biaknak, cun zatlang nun, cun eidin, cun hla, cun art zong hi nunphung ah ai tel ve. ‘Thuam’ ti atelh lo. ‘Laam’zong atelh lo. ‘Thuam’ hi miphun pakhat kan sinak alanghter cemtu alo nain nunphung cemcem ah kan ruahmi hi asilo. Aleng lang, aleng phaw men asi. Cun ai thleng lengmang, fashion asi bantukin. Vuleicung mi vialte kan thuam ai khat chin lengmang hoi. Nu he pa he tawhrolh kan ihrolh. ‘Laam’ zong hi azeimaw caan telawng ah tuahmi asi caah nunphung bikcem asilo.

“Nunphung’ kan timi ahhin ‘holh’ le ‘ca’ hi nunphung asi bik. Nunphung timi vialte ah holh hi abiapi bik. Holh lak zongah ‘min’ hi abiapi bik rih. Zeicahtiah min cu atu le atu kan hman. Nikhat ah voi tamtuk kan chim. Min cu holh ai thoknak asi. Laiholh cu Laimi lawng nih kan theih.

Miphundang nih an thei lo. Laiholh cu Laimi ta bak asi. Laimi kan sinak alangh tertu bik asi. Laimi kan sinak afian tertu bik asi. Hi ahhin atawi bikmi le afiang bikmi cu kan min asi. Laimin aneimi cu mivialte nih Lai asi an theih. Ai pheh kho lai lo. Laimin zong aneilo i Laiholh zong athiam lomi nih Laimi ka si ati ahcun zumh ding ah ahar lai. Anu le apa nih chimpi ahau hnga. Laithuam in Laimi na si na piah kho lai lo. Miphundang zong nih an ihruk tuk cang. Laimin cun Laimi na sinak na langhter khawh lai. Zeicahtiah miphundang nih Laimin cu an isak lai lo. Laimin aneimi nih Laimi ka silo ati ahcun an zum lai lo.

Kawl cozah nihcun Kawlmin isak hna seh ti an kan duh lai. Kawlholh in holh hna seh ti an kan duh lai. Mifim ram nihcun ralzaam pawl hmanh “Nan holh philh hlah uh. Nan nulepa holh thlau hlah uh. Nan fale nan holh chim hna ulaw achimtu lahkhah kan in peekpiak hna lai” anti. Phun tlau lonak ah holh abiapit ning an hngalh.

June thla chuak Muko mekazin ah khan Laimi le Laimin tiah ka tial cang. Asinain carel nakin bia ngaih hi huam deuh cio asi cu mu. Cucaah achim in ka von chim.

Nunphung timi cu midang neih lomi kanmah lawng nih kan neihmi hi asi. Cucu kan holh le kan min hi asi. Cucaah hmailei cu kan fale Laimin sak hna usi law Laiholh thiamter hna usih. Cucu nunphung zohkhenh le nunphung kilven cu asi ko. Laiholh thancho ternak ah atha tukmi adang pakhat cu Muko le Thinthang mekazin khuate lei caah laakpiak hi asi. Biasau chim ka duh nain biatawi chim caan asi caah mah vial lawng siseh. Kai lawm.

Note: Facebook a cahmai chung i kan lak chinmi a si.

Use Facebook to Comment on this Post

arrow
0
Connecting
Please wait...
Send a message

Sorry, we aren't online at the moment. Leave a message.

Your name
* Email
* Describe your issue
Login now

Need more help? Save time by starting your support request online.

Your name
* Email
* Describe your issue
We're online!
Feedback

Help us help you better! Feel free to leave us any additional feedback.

How do you rate our support?